ماقبل الارتباط

يمكن تكوني مش اجمل واحدة في الدنيا بس اكيد نفسك تحبي و تتحبي، واكيد نفسك في قصة حب رومانسية
فيه اللي بتتمنى تعيش قصة الحب دي من اول يوم ارتباط وفيه اللي بتأجلها لبعد الجواز
دي شوية نصايح لارتباط سليم يؤدي للهدف منه وهو الجواز إن شاء الله

 لما عم الحج يعدي

مبدئياً كده إحنا شعب متخلف ومينفعش انتي اللي تصارحيه بالرغبة في الارتباط حتى لو تموتي عليه؛ الراجل دايماً هو اللي بيقع عليه عبء بداية الارتباط لاعتبارات اهمها انك جوهرة غالية ولازم تفضلي غالية ومينفعش تنجري

في الغالب البنت بتحس بالشاب اللي بيحاول يتقرب منها بالغريزة، وممكن يكون الشاب خجول او ظروفه منيلة ومش هايقدر يتقدم دلوقتي، فيسكت ....
وانتي حاسة بيه
بس اوعي تتكلمي وتقولي على اللي انتي حاسة بيه ناحيته، افتكري دايما ان مافيش اميرة هي اللي قالت للفارس بتاعها إنها معجبة بيه وانك لازم تفضلي غالية

طيب ابتدى يلمح من بعيد وبيجس نبض؟
ساعتها بس تقدري تفتحي سكة ليه، بإبتسامة ، بشكر على مجاملة منه
ويمكن يحاول يحسسك انك غير الناس كلها ففهميه انك فهمتي

الخطوة اللي بعد كده إنه يصرح ودي اصعب خطوة عليكم انتوا الاتنين ....

مبدئيا كده متعمليش حاجة من ورا اهلك.... لا خروج ولا فسح ولا حتى انك تبادليه كلمات حلوة من ورا اهلك
لازم تفضلي غالية عشان كده من الاول وقوليله انك مش بتاعت كده

ظروفه مش مساعداه؟
يبقى لازم يدخل البيت من بابه ويكلم حد من اهلك من غير حتى قراية فتحة بس ربط كلام وخليه يكون صريح معاهم من الاول بظروفه

اذا اهلك شايفنه راجل وقد المسئولية هيرحبوا وممكن يساعدوه لو يستاهل
وابسط حاجة تتقاله لو هم مش معترضين عليه لما تتحسن ظروفك تعال

واذا اهلك رفضوا ؟
ماقولنا لازم تفضلي غالية ودا معناها تنسيه وكبري اهلك مهما حصل

حاجات حطيها حلقة ودنك

اللي مش مستعد لاي ارتباط رسمي هايتهرب من مقابلة اهلك
متدلوش فلوس واذا طلبها منك سيبيه فوراً
بلاش تعرفي حد بخيل
مافيش حد بيتغير ؛ اذا بيشرب سجاير مش هايبطلها في الغالب الا يومين اتنين ويرجعلها
لو عاوزة واحد شبه توم كروز بجسم فاندام وعقل و رزانة السادات و متدين زي ابو بكر ويكون عنده فلوس زي عم دهب يبقى استغطي كويس عشان دا حلم من احلام اليقظة

       على الهامش كده؟ كلمة "لازم تفضلي غالية" اتكررت كام مرة؟