أنا مبرمج

أنا مبرمج ويب والله العظيم
مش معنى إني باعرف أكود/أقطع مواقع يبقى تبعتلي صورة عاوزني أقطعها!
دي مش شغلتي آسف هاقولك لأ

آه باعرف فوتوشوب بس مش هافضل أغير ألوان صور و أصغر و أكبر
دي مش شغلتي آسف هقولك لأ


آه باعرف شوية منتديات و شوية وردبرس على حبتين صغنيين جملة بس ماتفتكرش إني باعرف كل حاجة

وبالمناسبة وقتي في البيت ملك ليا وبس أنا اللي أحدد أعمل فيه إيه وما أعملش إيه
يعني مش من حقك تتصل بيا 2 الفجر عشان موقعك فيه مشكلة

و على فكرة أنا بادخل الحمام و لامؤاخذة باعمل بيبي
ممكن تتصل 19 مرة وانا بعض ومش عارف ارد عليك فافهم ياغبي!

الكاتب مبرمج ويب تعب من إستعباط البشر

تحية للستات

بجد تحية للزوجات ...
والف الف تحية للزوجات

بجد باحمد ربنا إني راجل!

بإعتباري كنت مراهق وشاب محترم -و زود دا إن ماليش أخت بنت- فتصوري عن البنات كان من بره كده على قد معرفتي و على قد ما قرأت ...

الزوجة اللي تصحى بدري عن جوزها؛ و اللي تستحمل حالة الإكتئاب اللي بتمر بيها أي بنت كل شهر عشان تشوف طلبات بيتها بدون تقصير؛ أو تستحمل شهور الحمل الطويلة و ألمها وقلة نومها ؛ وكمان تستحمل شغل البيت !
وكمان المفروض إنها تستحمل الراجل و تمتص غضبه

بجد الستات بطلات
تحية ليهم ♥

وقف "البرنامج؟"

برنامج باسم يوسف اتوقف؟
عادي ما انا كنت متوقع كده من الحلقة اللي فاتت . باسم عاند الكل جيش و إعلام و أكيد الإخوان فكان طبيعي إن كله ينقلب عليه إلا من رحم ربي ....

بس إيه اللي قاله باسم يستدعي دا كله ؟
باسم ينتمي للفئة المحايدة اللي أنا بلا فخر منها و اللي يتم سلها ليل نهار!

الناس اللي مكنتش عاوزة مرسي يستمر. كانت عاوزاه يمشي في ستين سلامة و مع ذلك مكنتش شايفه إن إنقلاب الجيش عليه هو الحل!
الناس اللي شافت إن اللي حصل إنقلاب!
الناس اللي رفضت إقصاء الإخوان برغم أخطائهم!
الناس اللي أرق نومها الناس اللي ماتت و الجثث اللي تفحمت!

لكنها في نفس الوقت معندهاش إستعداد تقف في صف الإخوان لإنها عارفة الاعيبهم كويس؛ و لإنهم لو انتصروا هتكون أول من هيغدوروا بيه