عاوز تعرف يعني إيه كلمة «سَفَهْ» شوف الشعب المصري بيتجوز ازاي..
إذا كنت قاعد في الاستاد فالعروسة هتلاقيها على شمالك و العريس هتلاقيه على يمينك وإذا كنت قاعد قدام شاشة كومبيوتر أو إذا كان ربنا فاتح عليك و معاك موبايل او تابلت خد نفس "عميك" من اقصى "معامعيك" اللي انا مش عارف دي تبقى فين بالظبط وموقعها فين من جسم الانسان وتابع معايا.
الاول لما تروح تتقدم لازم اهل العروسة يحسسوك بقيمتها وفي الغالب ابو العروسة هتلاقيه عاوزك تكمل مسيرته هو و تخليها تعيش في نفس المستوى اللي هو معيشها فيه بعد يمكن٣٠ سنة جواز ، ومش مهم إن هو نفسه دخل في اوضة وصالة واحتمال يكون من غير صالة اساساً وحمام مشترك!!
وبعدين النظرية الغريبة اللي انا مش فاهم جت من اي شرع او دين: النظرية اللي بتقول "لما يتعب عشان يتجوزها هايصونها" رغم اني اعرف ناس تعبت عشان تتجوزها و مصنهاش!!
اه والله زمبؤلك كده
وبهدلها و ضربها وهانها ومحفظش عليها خالص.
نيجي بقى لحاجات وتفاصيل كتيرة -والشيطان يكمن في التفاصيل- لازم تجيب شبكة بكذا او كذا جرام دهب
ولازم شقة كام اوضة
تفاصيل التفاصيل بقى: انت هتجيب كذا وكذا وكذا واحنا هانجيب كذا وكذا
وبعد تفاصيل التفاصيل نتكلم في الفرعيات، هو مين هايجيب الستاير ؟
ومين هاينجد؟
ومين هايجيب قماش التنجيد؟
ومين هايحاسب الصنايعية؟
ومين هايحاسب العربية اللي هاتنقل التنجيد؟
وهكذا لحد ما الناس تتكلم في ادق و اصغر التفاصيل واللي عارفه ان الشيطان مافيش احب على قلبه من انه يجهض تكوين بيت مسلم
و الدخول في التفاصيل وإفساد ذات البين دي مهمة الشيطان الاساسية
ومش مهم الشاب او البنت توصل لسن ٣٥ سنة بدون جواز
ومش مهم عمارة الدنيا اللي هي مهمة الانسان "إني جاعل في الغرض خليفة" --يعني يخلف بعضهم بعضاً
ومش مهم نحرم اتنين يحبوا بعض من إنهم يحبوا بعض في الحلال
ومش مهم واحد يفضل خاطب واحدة ٣ و ٤ سنين و في الاخر ميحصلش نصيب بسبب طلبات اهلها المبالغ فيها
كلمتين فيهم الخلاصة "إذا جاءكم من ترضون دينه وخلقه فزوجوه" و "التمس خاتما من حديد"
ليست هناك تعليقات:
إرسال تعليق